आज......

अधीर छु आज

मनमा केही गर्लम्म बज्रे जस्तो

हृदयमा केही गर्हुङ्गो झुन्डिए जस्तो

त्यसै त्यसै गलिरहेछु,

धुईं-धुईं बिसौनी खोजिरहेछु ।

डराएको छु आज,

दौडमै नभइ कसैले ऊछिन्ने डर,

युद्धमै नभइ कसैबाट रेटिने डर,

त्यसै त्यसै काँपिरहेछु,

अन्तरकुन्तरमा आँट खोजिरहेछु ।।

झुक्किएको छु आज,

उषाको उल्लास र सन्ध्याको अत्यासमा,

मालश्रीको ताल र ताण्डवको डमडममा,

त्यसै त्यसै रङ्बङ्गिरहेछु,

वृत्तमा आदि-अन्त खोजिरहेछु ।।।

अधीर, त्रसित, भ्रमित छु म आज......